Duha ka anggulo ang ginalantaw nga rason kun ngaa ginpatay ang lalaki nga residente sang Barangay Felisa sa 18th St. Brgy. 5 syudad sang Bacolod sang Sabado sang gab-i, Hulyo 2.
Suno sa station commander sang Bacolod Police Station 2 nga si Police Captain Paul Vincent Pendon, kaangtanan sa illegal nga druga kag daan nga hiligut-anon ang ginalantaw nga motibo sa pagtiro-patay sa biktima nga si Geory Adeva, legal age kag residente sang Purok Totong, Brgy. Felisa, Bacolod City.
Madumduman nga si Adeva nga nagasakay sa motorsiklo ang ginsundan sang suspek nga nagasakay man sa motorsiklo tubtob nga nakalab-ot sa nasambit nga lugar kag siya ang gintiro.
Matapos ang krimen, nagpalagyo ang suspetsado sa nakatungdan nga direksyon.
Ginpahayag ni Pendon nga suno sa witness, nabatian pa sini ang ginhambal sang suspek nga “katapusan mo na, naling-an na ako sa imo. “
Suno sa station commander, mahimo nga may kaangtanan sa iligal nga druga kag daan nga hiligut-anon ang pagpatay kay Adeva santo man sa ginpahayag sang suspek antes pa man ini gintiro.
Ginakumpirmar pa sang Bacolod Police Station 2 ang ila nakuha nga impormasyon nga natiruhan ang biktima sang tuig 2019 apang ginahibalo pa kun ngaa natiruhan ini.
Nagapadayon man ang pagtipon sang mga ini sang mga CCTV footages angot sa insidente.
Suno kay Pendon, may nakuha naman sila nga kopya apang indi maathag.
Subong nga adlaw natalana sila nga magkuha sang cctv footage sa isa ka university nga malapit sa ginluntaran sang insidente agud nga makabulig sa imbestigasyon.
