Nagapati ang chairperson sang committee on police matters sa Sangguniang Panlungsod sang Bacolod nga ang krimen batok sa mga tawo ang mabudlay na mapunggan matapos ang asod-asod nga shooting incidents nga nagluntad sa ciudad.
Sa interview sang Bombo Radyo Bacolod kay Councilor Al Victor Espino, ang krimen batok sa mga tawo ang mabudlay punggan apang dapat nga may yara sang crime solution ang mga otoridad batok diri.
Suno kay Espino, kinahanglan nga may yara sang makasuhan kag mabilanggo nga suspetsado agud nga mahatagan man sang hustisya kag masolbar ang nagluntad nga krimen.
Suno diri, updan man sini ang ginpahayag ni Bacolod City Mayor Alfredo Benitez nga hatagan sang dugang nga pondo ang mga kapulisan sa syudad sang Bacolod agud nga mapasanyog pa ang ila programa batok sa krimen sa syudad sang Bacolod.
Ginpahayag man sini nga ang Benitez administration ang magapangita man sang kuhaan sang pondo agud nga madugang sa pondo sa Bacolod City Police Office (BCPO) para makabulig agud nga mas mapaayo pa ang ila nga mga ginahimo batok sa mga krimen kag mapabilin ang kalinong kag katawhay sa syudad sang Bacolod.
Ginpahayag man ni Espino nga ang syudad sa idalom sang Benitez administration ang magainstall man sang high definition cameras agud nga makabulig sa pagsolbar sang krimen sa syudad sang Bacolod.
Suno pa diri, lantawon niya man ang control rooms sang mga installed cctv cameras sa syudad sang Bacolod agud makita kun ano ang matuod nga sitwasyon kag dugangan ang mga makita nga kakulangan.
Suno kay Espino, ang cctv footage ang ginabaton na sang korte nga admissable evidence batok sa krimen gani nagakadapat lang nga klaro kag maathag ang kuha sang cctv sa nagluntad nga insidente kaangay lamang sang pagpangluthang.
Nagpanawagan man ini sa mga pumuluyo sa syudad sang Bacolod sang kooperasyon agud nga masolbar ang nagluntad nga krimen sa syudad sang Bacolod.
Samtang, ginpahayag man ni Espino nga isa pa ka pagatutukan sang Benitez Administration ang pagsolbar sang problema sang mga spaghetti wires sa syudad.
Suno diri ini ang isa man ka napabay-an nga problema nga dapat solusyunan.
