Pilason ang mga pasahero sang carry nga nakabunggo sa Sitio. Mambucano, Brgy. Cabatangan, syudad sang Talisay kahapon sang udto, Hulyo 3.
Sa interview sang Bombo Radyo Bacolod kay Police Staff Sergeant Ryan Calalas, traffic investigator sang Talisay City Police Station, ang sakay sang naaksidente nga Susuki van ang naglagaw sa Almira resort sa syudad sang Talisay kag papauli na apang nadulaan sang control ang driver gani nagdesisyon nalang ini nga palapakon ang goma sa kanal agud nga magpundo ang salakyan.
Ginpahayag man sang driver nga nadulaan ini sang kontrol bangud mabudlay ang dalan.
Suno diri, onse ang nagasakay sa carry lakip na ang duha nga minors nga ginalakipan sang tatlo ka bulan kag tatlo ka tuig nga bata.
Minor injuries lamang ang naagom sang mga biktima nga gilayon man gindapatan sang pagbulong sang nagresponde nga katapo sang Talisay City Disaster Risk Reduction Management Office (TCDRRMO).
Ginpahayag man ni Calalas nga nagpadulong man ang sakay sang van sa Talisay City Police Station nga irelease nalang ang driver bangud indi man ang mga ini interesado sa pagpasaka sang kaso apang ginpaathagan man ang mga ini nga may yara sang kinahanglan nga sundon nga proseso.
Suno pa diri, ang driver ang wala ginhingadlan kasunod man sang ginhingyo sang mga sakay sang van.
Sa karun, stable naman ang kondisyon sang mga pasyente.
