Tatlo ka mga pasahero nga nagabantay sa terminal ang pilason matapos nabungguan sang naglapaw nga ceres bus sa Dumaguete Ceres Terminal sa Barangay Calindagan, Dumaguete, Negros Oriental kaina sang udto.
Sa interview sang Bombo Radyo kay Jade Seballos, media relations officer sang Vallacar Transit Inc., ang bus nga ginamaneho ni Jobie Lajos, 43-anyos, sang Santa Catalina, ang may ruta nga Dumaguete-Bayawan vice versa.
Makit-an sa footage sang CCTV nga wala nakapreno ang driver pag-abot sa terminal kag nagbunggo sa mga nagapungko nga pasahero.
May isa nga naipit sang goma gani napilitan ang mga lalaki nga yara sa terminal nga ihayaw ang bus antes ginpaisol sang driver agud nga makuha ang pasahero.
Santo sa report sang Dumaguete City Police Station, ang mga pilason ang naga-edad 14-anyos; 12-anyos; kag pito ka tuig.
Suno kay Seballos,alas 10:30 sang aga, nagkuha pa sang iya zero accident incentive ang si Lajos bangud sa 15 ka tuig sini nga pagserbisyo, matinlo kag maayo ang iya rekord.
Pagka-udto, nagluntad ang aksidente kun sa diin naglapaw ang nasambit nga ceres bus sa terminal kag nabungguan sini ang mga pasahero nga nagabantay.
Suno kay media relations officer, pagkatapos sang insidente, ila ginkuhaan sang footage ang pagtsekyar kag wala sang defect sa unit.
Suno diri, napaidog pa ang ceres bus kag nakuha sa maayo nga pamaagi gani indi ini makabig nga mechanical defect kaangay sang ginhambal sang driver.
Makit-an man sa footage nga mahinay kag yara lamang sa 10 kilometer per hour ang padalagan sang driver.
Dako naman ang pagpasalamat sang Vallacar Transit Inc. nga indi seryoso ukon patal ang injuries sang mga biktima kag sila ang gindala sa balaybululngan.
Ang bus company naman ang magasabat sa balayran sa ospital.
Sa karun padayon pa nga ginaimbestigahan sang Vallacar Transit ang driver sang ceres bus.
