Komporme ang isa ka local historian nga kun islan gid man ang ngalan sang Ninoy Aquino International Airport, ibalik nalang ini sa orihinal nga ngalan nga Manila International Airport.
Ini ang kasunod sang hagna nga ginfile ni Negros Oriental 3rd District Rep. Arnolfo Teves nga islan ang ngalan sang NAIA sang Ferdinand E. Marcos Sr. International Airport.
Santo sa House Bill 610 nga ginfile ni Teves, nagakaangay lang nga hatagan sang pagkilala ang pagpatindog sang anay presidente sang main gateway sang Pilipinas.
Sa interview sang Bombo Radyo kay Modesto Sa-onoy, ang NAIA ang nagaserbe sadto nga US Air Force Base apang sang natapos ang gyera, ginturn-over ini sa gobyerno sang tuig 1947 sa idalom ni anay Presidente Manuel Roxas.
Ang una nga international runway kag taxiway sang paluparan ang natapos sang 1953 sa idalom sang administrasyon ni anay Presidente Elpidio Quirino.
Si anay Presidente Marcos ang nagpungko sa pwesto sang tuig 1965 ukon 12 ka tuig ang nakaligad humalin sang nangin fully operational ang sadto Manila International Airport.
Sang tuig 1972, nag-issue si Marcos Sr. sang executive order nga nagamandu sang expansion kag pagdevelop sang MIA.
Sang tuig 1987, ang ngalan sang MIA ang gin-islan sang Ninoy Aquino International Airport paagi sa Republic Act 6639, sunod kay former Senator Ninoy Aquino nga gin-assassinate sa tarmak sang paluparan sang tuig 1983 sa idalom sang Marcos administration.
Suno kay Sa-onoy, mangin divisive kun islan ang ngalan sang airport sang Ferdinand E. Marcos Sr. International Airport gani kun tuyo gid man sang mga mamalidha nga ini ang islan, mas maayo pa nga ibalik nalang ang orihinal nga ngalan nga Manila International Airport.
