Ginsuhestiyon sang sugar industry leaders sa Negros Occidental nga mapatigayon ang Sugar Regulatory Administration sang survey agud mahibaluan ang kulang nga kalamay antes mag-import ang Pilipinas.
Suno kay SRA Administrator Hermenegildo Serafica, nag-import ang pungsod sang 230,000 metric tons sang kalamay agud nga mapun-an ang kulang nga supply sang kalamay.
Sa interview sang Bombo Radyo kay United Sugar Producers Federation (UNIFED) President Manuel Lamata, wala nagkadto sa mga bakery kag public markets ang 230,000 metric tons nga gin-import sang pungsod kundi nagdiretso lang ini sa dalagko nga mga beverage companies.
Suno kay Lamata, kun matuod nga kulang ang supply sang kalamay, kuntani para sa konsumo sang mga pamalay ang 4 million bags sang kalamay nga gin-import.
Panindugan ni Lamata, sang bulan sang Mayo lang nag-untat ang milling season gani imposible nga wala na sang kalamay.
Suhestiyon sang UNIFED, mas maayo kun makomisyon ang SRA sang private surveyor nga magalibot nationwide agud maimbentaryo ang kulang kag amo lang ini ang igaimport.
Suno sa sugar industry leader, sarang gid makaimport ang Pilipinas apang para lang ini sa local consumption kag indi paghatagan sang supply ang mga beverage companies bangud sa sini nga paagi, maganubo ang presyo sa local market.
Sa tunga-tunga sang Agusto tubtub Setyembre, magasugod naman ang milling season
Ginalantaw naman ni Manuel Lamata nga mahimo maganubo ang supply sang kalamay sa masunod nga tuig.
Suno kay Lamata, kulang sa abono ang mga tubo sa karon bangud nagtipid ang mga planters sang abono bangud tuman kamahal.
