Patay ang 46-anyos nga lalaki matapos ginluthang sang ginaalegar riding-in-tandem suspects sa Purok Bulak, Barangay Mandalagan, Bacolod City, Sabado sang gab-i.

Ang biktima ang ginkilala kay Jovanie Gonzales, 46-anyos, residente sang nasambit nga barangay.

Sa inisyal nga impormasyon, si Gonzales ang nagapungko sa atubang sang isa ka tiyange malapit sa iya puluy-an sang may naglabay nga motorsiklo sakay ang duha ka mga persona, kun sa diin ang angkas sini nga nagasuksok sang hoodie amu ang nagluthang sa iya.

Sa ulo ang igo sang biktima samtang isa naman ka lupok ang nabatian sang mga residente.

Sa interview sang Bombo Radyo kay Gemima Gonzales, utod ni Jovanie, nagaisahanon lamang sa iya balay ang biktima bangud bulag na ini sa asawa kag ang iya mga kabataan ang nag-upod sa ila iloy.

Suno sa iya, apisar nga medyo maisog ang iya utod, mabuot ini kag wala sang kontra.

Suno diri, sang Biyernes sang gab-i, may nakit-an ini nga lalaki nga nagpalapit kag nag-istorya kay Jovanie nga daw kaangay nga may gina-eksplekar sa iya.

Magluwas diri wala naman siya sang may nahibaluan nga may kontra sang iya utod.

Sa karun nagapadayon pa ang imbestigasyon sang kapulisan tuhoy sa insidente.