Nagdangat na sa 196 porsyento ang pagsaka sang dengue cases sa syuda sang Bacolod sa morbidity week No 26 sang Hulyo 2 kun ipaanggid sa kaangay nga period tinalikdan nga Tuig.
Suno kay Dr Grace Tan, Environment Sanitation Division Head sa Bacolod City Health Office (CHO), ini resulta sang on and off nga rainy season.
Paathag sang doktor nga sa tion sang tin-ululan, nagadamo ang populasyon sang lamok nga nagaresulta man sa pagpangagat sang mga ini bangod ang dugo ang makabulig sa mga ini sa pagpadamosang ila nga species.
kun ipaanggid sa 104 nga kumpirmado nga kaso sang dengue tinalikdan nga tuig kun sa diin may duha nga nadulaan sang kabuhi, subong nga tuig, nagdangat na sa 308 ang kaso kag anom na ang nadulaan sang kabuhi.
Ang anom nga napatay bangod sa dengue ang ginalakipan sang 11 anyos nga lalaki sa Barangay Singcang-Airport, 20 anyos nga babayi sa Barangay Pahanocoy, 9 anyos nga lalaki sa Barangay Sum-Ag, 75 anyos nga lalaki sa Barangay Tangub, 13 anyos nga babayi kag 7 anyos nga lalaki lunsay mga residente sa Barangay Mansilingan.
Paathag sang doktor nga ang 75 anyos nga lalaki nga napatay ang may-ara sang comorbidity kag ginpalala sini ang komplikasyon tubtob sa nagtuga sang pagnubo sang blood pressure kag bleeding.
Suno kay Dr Tan, santo sa ila nga record, ang mga nagkadengue ang yara sa tatlo ka bulan nga lapsag tubtob 86 anyos, apang nagapadayun pa ang surveilance sang City Health Office agud matumod ang age group nga sarang ma-infect sang dengue.
Sa karun, ang may pinakamadamo nga kaso sa syudad ang ginalakipan sang Barangay’s Tangub, Mansilingan, Singcang-Airport, Estefania, Sum-ag, Taculing, Alijis, Mandalagan, Villamonte, Handumanan kag Granada.
Ang mga nasambit nga barangay ang nakarecord sang 15 tubtob 27 ka mga kaso sang dengue humalin Enero 1 tubtob Hulyo 3, 2022.
