Subong nga bulan sang Hulyo, ginahiwat sang tanan nga pwersa sang kapulisan sa bilog nga Pilipinas ang Police Community Relations (PCR) Month.
Suno kay P/Lt Judesses Catalogo, acting public information officer sa Negros Occidental Police Provincial Office (NOCPPO), ini ang tuigan nga ginaselebrar sang hanay sang mga kapulisan, nga gin-umpisahan sang Hulyo 24, 2005.
Ang highlight sang aktibidad amo ang pagpakita sang importansya sang partisipasyon sang kumunidad.
Kalakip man sa mga programa nga ginpatigayon sang NOCPPO amo ang blood letting activity sa kolaborasyon sang Corazon Locsin Montelibano Memorial Regional Hospital kahapon.
Suno kay Catalogo, nangin madinalag-on ang aktibidad kag madamo sang nagdonar sang dugo.
Samtang imbes nga magpanghatag sang citation tickets, nagpanghatag man sang arozcaldo ang mga kapulisan sa mga motorista.
Ini ang pagpakita sang PNP personnel nga sila ang wala lang nagaserbisyo sa peace and security kundi may-ara man sang pag-ulikid sa mga pumuluyo ilabi na sa nagasaka nga presyo sang mga balaklon.
Samtang, nag-offer man ang NOCPPO sang clinic para sa mga Table Tennis Athlete pinaagi sa pag-imbetar sang atleta gikan sa National Team, kun sa diin 20 ka mga kabataan sa banwa sang Murcia ang nakabenipisyo.
Sila ang ginhatagan man sang libre nga bayo kag equipments.
Target sang mga ini nga makahatag sang inspirasyon sa mga kabataan pinaagi sa sports agud indi ang mga ini madala sang indi maayo nga mga butang kaangay sang iligal nga droga.
Paathag ni Catalogo, nga ginakilala nila ang community relations bangod kun wala ang partisipasyon kag suporta sang publiko, mabudlayan man ang mga kapulisan sa pagpatigayon sang mga programa partikular na sa kriminalidad.
Ginapasalamatan man sang mga kapulisan ang mga force multiplier, local government unit (LGU) kag mga pribado nga organisasyon kag indibidwal nga kabulig man sang mga ini sa pagseguro sang peace and order sa Negros Occidental.
