Gin-athag sang chairperson sang committee on markets sa Sangguniang Panlungsod sang Bacolod nga igaimbentaryo pa ang mga market vendors antes sila pahalinon sa mga sidewalk sa palibot sang Libertad Public Market, Burgos kag Central Market.
Sa interview sang Bombo Radyo kay City Councilor Celia Flor, gin-ayo na ang mga vendors nga hatagan sang lugar ang mga sidewalk agud hilway nga makaagi ang mga konsumidor.
Apang indi pa sila mapahalin gilayon kundi imbentaryohon anay ang mga vendors kun sila ang taga-Bacolod ukon pangayaw.
Sa karon suno kay Flor, prayoridad man ang paglimpyo sang Bacolod markets kun sa diin may mga volunteer cleaners nga nagaduty subong kag may regular cleaners naman.
Natalupangdan naman sini nga medyo naglimpyo na ang fish section sa Libertad Public Market bangud mismo ang mga vendors ang nagalimpyo.
Mabulig man ang City Engineer’s Office sa pagflush sang mga drainage bangud nagabaha na kun todo ang ulan.
Suno kay Flor, temporaryo pa lang ini nga measures agud maplastar ang merkado samtang ginaplano ang full rehabilitation.
Aminado ang konsehal nga indi mabantayan ang mga vendors kada oras gani nagalaom ini nga sila ang magakooperar sa pagpabilin sang kalimpyo.
