Nagpanawagan ang election officer sang ciudad sang Bacolod sa nagapakilala nga volunteer agud nga magtadlong sang pila sang mga maparehistro sa COMELEC sa Robinsons Place Bacolod City kaina sang aga nga untatan na ang iya ginahimo.
Sa interview sang Bombo Radyo Bacolod kay Atty. Kathrina Trinio Caña, wala sila naga-authorize sang mga tawo nga magfacilitate sang mga nagalinya sang mga nagaparehistro bangud ang systema sang Comelec ang first come, first served basis.
Suno kay Cana, ang pagpanagtag sang Comelec sang numero ang nagaumpisa alas-7:00 ang takna sa aga.
Suno diri, bisan nagpulaw pa ang isa ka persona sa pila, indi ini gihapon mahatagan sang numero kun wala ang presensya sini sa linya sang nag-umpisa sa pagpanagtag sang numero.
Liwat sini ginpahayag nga ginadiscourage sang Comelec ang pagpila sang temprano.
Nagapanawagan man ini kay Heintjie Rizate nga untatan na sini ang pagpanghatag sang numero sa mga magaparehistro bangud wala ini ginapahanugutan sang Comelec kag indi na mag-intra sa trabaho sang nasambit nga ahensya.
Sa karun, nagdangat na sa 600 ka mga applicants ang ginacater sang Comelec kag ginpahayag man sini nga mas maayo ang ila sitwasyon sa malls kag mas mabantayan man sang mga ini ang nagaparehistro.
