Suportado sang master cutter sang isa sa mga patahian sang uniform sa central market sa syudad sang Bacolod ang pahayag ni Department of Education Secretary Vice President Sara Duterte nga indi required ang pagsuksok sang uniform sa pagbukas sang klase subong nga tuig.
Sa interview sang Bombo Radyo Bacolod kay Felix Taquiso sang Taquiso tailoring sa central market, bisan ginasuportahan nila ang pahayag sang Deped Secretary, mas maayo sa gihapon nga ang tanan ang magasuksok sang uniform agud nga makadugang sa ila nga income.
Suno kay Taquiso, sa karun nga indi ang tanan nga magsuksok sang uniform, mabuhinan man ang ila nga kliyente bangud ang mga nagaeskwela nalang sa college kag pribado nga eskwelahan ang nagapatahi sa ila.
Suno diri, labor lamang ang ginasukot sa pagpahimo sang set sang uniform kag ang ila sukot ang P600 sa mga adults kag sa mga kabataan ang P450.00 tubtob P500.00.
Suno kay Taquiso, nakaagi man sila sang pandemic nagpauli nga P20.00 lamang ang ila nga kita.
Apang sa karun nag-amat amat na balik ang ila nga mga suki nga nagapatahi sa ila.
Suno diri ang ila kuntani nga ginapasalamatan ang pagbukas sang klase bangud madamo na ang nagapatahi sa ila apang mabuhinan ini bangud sa ginpahayag sang bise presidente.
Nagahatag man sila sang discount kun masobra sa isa ka set ang ipaubra sang customer.
Suno kay Taquiso ang ila nga tailoring shop ang 22 anyos na kag ini na ang ila nga nangin palangabuhian humalin pa sa ila Lolo.
