Naghatag sang warning ang city government sa mga junk shops kahapon kag ginpaintindi sa ila ang mga konsekwensya matapos ginserbehan sang notice of violation kahapon sang aga ang isa ka junk shop sa Bacolod kadungan sang hugot nga pagpatuman sang Anti-Fencing Law ukon pagpangawat sang kable sang kuryente.
Una diri, nagpagwa sang Executive Order No. 15 Series of 2022 si Bacolod City Mayor Alfredo Benitez nga nagamandu sang intensified kag strict monitoring kag implementasyon sang Anti-Fencing Law may kaangtanan sa pilfering ukon pagkawat sang copper kag electrical wires kag iban pa nga kaangay nga transmission line materials.
Suno kay Secretary to the Mayor Atty. Karol Joseph Chiu, matapos nagconvene ang task force nga magatutok sa kinawatay sang kable sang kuryente sa ciudad, ila ginkadtuan ang isa ka junk shop kahapon kag sa ila initial nga impormasyon, wala ini sang business permit.
Apang sa ila pagpang-usisa, nahibaluan nga may yara ini sang business permit apang lain ang pangalan nga nakabutang.
Suno kay Chiu, ginpapanaugan ini sang notice of violation nga kun ano ang matuod-tuod nga pangalan sang negosyo, dapat amu man ang ibutang sa gin-issue nga business permit.
Kumpirmado man nga nagapamakal ang mga ini sang mga kinawatan nga mga wires kag nagakuha sang mga unregistered suppliers.
Suno diri, ginwarning anay ang mga junk shops kag ginpaintindi kun ano ang konsekwensya kag gina-engganyo man ang mga telecommunication companies nga kun may yara sang problema, ipahibalo sa city government.
Suno sa iya, ang ini nga tikang sang city government ang agud mabuligan ang mga telecommunication companies kag ang ekonomiya sang Bacolod bangud nagakaapektuhan bangud sa illegal nga mga buluhaton.
