Mga nagparehistro para sa Barangay and SK Elections sa Negros Occidental, nagdangat sa kapin 86 mil kadungan sang pagtakop sang voters registration kahapon

Nagtakop na kahapon adlaw sang Sabado, July 23 ang tatlo ka semana nga voter’s registration sang Commission on Election (Comelec) para sa Barangay kag SK Elections sa maabot nga December 5.

Santo sa record sang Provincial COMELEC Office sang Negros Occidental, nagdangat sa kapin 86,582 ang mga nakapa-rehistro sa probinsya as of July 22.

Santo sa pahayag sang Comelec, pinakadamo nga registrants ang halin sa Bacolod City nga naglab-ot sa kapin 8,812 ginasundan sang Bago City kag Kabankalan City, samtang may pinaka-nubo naman nga new registrants ang banwa sang Candoni nga naglab-ot lang sa 943.

Wala na sang extension pa ang voter’s registration, apang mahimo ini liwat buksan kon madayon ang ginaduso nga pagkanselar sang Barangay kag SK Elections.