Patay ang isa ka 41-anyos nga lalaki matapos matiruhan samtang yara sa kampo sa may bahin sang Sitio Lacanon 1, Brgy. Libertad sa syudad sang Escalante, Negros Occidental.
Nagluntad ang kremin sadtong Biernes, pasado alas-6 sa aga, Hulyo 22, 2022.
Santo sa impormasyon nga nagikan sa Escalante City Police, yara sa iya nga kampo ang biktima nga ginkilala sa kay Hadjen Casipong, 41-anyos, nga residente man sang nasambit nga lugar.
Nag-abot ang anum ka mga armado nga lalaki kag ginpalapitan ang biktima.
Wala sang kung ano nga rason, gilayon nga ginluthang sang makapila ka beses si Casipong nga naigo sa nagkalain-lain nga parte sa iya kalawasan nga gintunaan naman sa iya kamatayon.
Matapos mahimo ang pagpatay sa biktima, insigida nga naglakat padulong sa nabukid nga bahin sang lugar ang nasambit nga grupo.
Sa karon, blanko pa ang kapulisan sa kung ano ang motibo sa pagpatay kay Casipong kag kung sino ang mga suspek sa likod sang kremin.
Narekober naman sa lugar ang isa ka basiyo sang kalibre .45 nga pistola kag tatlo ka basiyo sang AK47 nga armas nga gingamit sa pagluthang sa biktima.
