Gintawag ni Negros Occidental 5th District Representative Congressman Dino Yulo nga “impressive” ang kaundan sang State of the Nation Address (SONA) Ni President Ferdinand “Bongbong” Marcos Jr kahapon.
Sa interview sang Bombo Radyo kay Yulo, gintawag sini nga “impressive both in substance and form” ang isa ka oras kag 14 ka minutos nga SONA sang Presidente.
Suno diri, ginpatpat sini ang iya mga marching order sa kada departmento kag ginsaysay man sini kun ano ang mga legislative agenda nga kinahanglan.
Magluwas sa mga plano sini sa new normal, suno sa kongresista, ginbalay man ni Marcos ang iban nga mga issue kaangay sang Reserved Officers’ Training Corps (ROTC).
Suno sa iya, wala man sang controversial sa maskin ano nga ginpropose nga legislative agenda sang Presidente bangud ginbutang man sini kun ano ang mga rason sang kada proposal.
Suno kay Yulo, wala sang may ginmentionar si Marcos nga partikular nga persona ukon ahensya kundi naghimo ini sang framework tuhoy sa mga plano sini para sa pungsod.
Apisar nga wala namentionar ang liwat nga pagtukod sang Negros Island Region, suno sa 5th district representative, pagasiguruhon nila nga ini ang mapasar sa Kongreso kag Senado kag wala man sila sang may nagakakit-an nga pagpamatok sa pagpasar sini.
Nagapangabay man ini sa mga pumuluyo nga updan ang gobyerno sa pagbalay sang mga tikang para sa new normal.
Si Yulo ang nakigbahin lamang sa SONA pinaagi sa teleconference kag wala nakatambong sa personal matapos nagpositibo sa swab test.
