Nagapati ang chief executive officer sang Metro Bacolod Chamber of Commerce and Industry (MBCCI) nga husto ang nangin paglantaw ni President Ferdinand “Bongbong” Marcos Jr. sa State of the Nation Address (SONA) nga ginahimo indi agud maghatag sang solusyon sa problema, kundi planuhan ang padulungan sang pungsod sa masunod nga anom ka tuig.
Sa interview sang Bombo Radyo kay Frank Carbon, nagapati ini nga insakto ang ginhimo ni Marcos Jr, sa iya nga SONA kun sa diin indi ini tion agud maghatag sang solusyon sa problema kundi adlaw agud planuhan ang padulungan sang pungsod sa iya termino.
Suno kay Carbon, indi trabaho sang Presidente ang magahatag sang solusyon sa problema bangud iya ini trabaho sang Gabinete, kundi maghatag sang goal sa pungsod.
Sa assessment sini, kalaban sa ginpatpat sang Presidente indi ang immediate solusyon sa problema kundi long term goal kag wala ini nagpabilin nga damgo bangud ginbutangan sini sang layi nga amu ang magaimplementar sang strategic plan.
Suno sa iya, ang 19 ka mga layi ang strategic plans ukon goals ni PBBM agud malab-ot sini ang mga handom sang Pilipinas sa iya termino.
Sa kaundan sang SONA sang Presidente suno kay Carbon, ang goal sini amu nga may kuhaan sang pagkaon, pagmodernize sang agrikultura kag market to market roads agud indi na mag-import sang pagkaon.
Wala man ini sang ekspektasyon sa administrasyon sa bahin sang ekonomiya bangud macro-economics ang plano sang gobyerno kag daw kaangay nga ginapahayag sini nga yara na sa kamot sang mga taga industriya ang ekonomiya kag ang gobyerno ang magapatindog lamang sang mga imprastraktura.
Nagapati ang MBCCI chief executive officer nga may yara sang maayo nga adviser si Marcos kag siya mismo ang nakaintindi nga siya ang nagaset sang goal.
Nagalaom ini nga updan sang mag Kongresista kag mga Senador ang mga ginaduso sang Presidente agud ini ang matuman kag mangin layi.
Nagpanugyan man ini sa mga pumuluyo nga indi mag-expect nga si PBBM ang mag-ubra sang milagro kag dapat sa gihapon nga magpaninguha kag magtrabaho.
