Ginapaabot ni Bacolod City Lone District Congressman Greg Gasataya nga makonsiderar na sang Department of Health ang pagtukod sang Bacolod-Negros Heart and Kidney Center matapos namuno ni President Ferdinand ‘Bongbong’ Marcos ang pagbutang sang specialty hospitals sa mga probinsya.
Si Gasataya ang nagfile sang hagna para sa pagtukod sang Bacolod-Negros Heart and Kidney Center sa 18th Congress.
Sa hagna nga ginrefile sang kongresista sang Hunyo 30, gindala sini ang Negros bangud nagapati ini nga indi lang ini para sa Bacolod kundi para sa bilog nga Negros.
Suno kay Gasataya, long overdue na ang specialty hospitals sa mga kaprobinsyahan bangud tuman na ini ka kinahanglan bangud sa karon, kinahanglan pa sang mga pasyente nga magpadulong sa Metro Manila.
Ang hagna ang ginfile sa 18th Congress apang wala natapos bangud sa pila ka mga rason, apang bangud sa pronouncement ni Presidente Bongbong Marcos, nagapati si Gasataya nga magapasaka ini sa interest sang DOH nga iconsider ang iya ginaduso.
Ini ang preparasyon man para sa Negros Island Region gani nagsignify naman ang mga kongresista nga ila suportahan ang hagna.
Nahibaluan nga sa karon, may mga pasyente pa nagikan sa Negros Oriental nga ginadala sa Corazon Locsin Montelibano Memorial Regional Hospital, gani para kay Gasataya, wala sang exclusivity ang ospital.
Suno sa kongresista, mahal ang gastuhon sang isa ka pamilya kun kinahanglan dal-on sa Metro Manila ang ila pasyente gani nagakadulaan ini sang interes nga magpabulong.
Ginakabig ni Gasataya nga personal para sa iya ang rason sa pagfile sang hagna bangud ang iya iloy ang napatay bangud sa heart kag kidney ailment sang mid-90s kun sa diin wala ini nadala ini sa Metro Manila bangud sa kakulang sang kwarta.
Ang hagna nga iya ginrefile ang ginrefer sa committee on health sa Lower House sang Hulyo 26.
