Gin-athag sang secretary general sang United Negros Drivers and Operators Center (UNDOC) nga wala sila nagapamatok sa modernization program sang mga public utility jeepneys apang luyag nila nga ini ang magaagi sa insakto nga proseso.
Sini nga semana, nagsugod na sa pagbyahe ang isa ka modern jeepney nga may routa Homesite-Central Market kun sa diin P13 ang minimum nga plete.
Sa interview sang Bombo Radyo kay Diego Malacad, ginpahayag sini nga wala sila nagapamatok sa modernization sang mga jeepney bangud makebenepisyo diri ang mga pumuluyo kun sa diin indi sila mainitan kag indi mabasa sang ulan.
Apang suno kay Malacad, indi sa karun ang nagakaigo nga timing agud magnegosyo kag intuon ukon tuntuhon ang mga pumuluyo.
Suno diri, ang mga drivers kag operators ang gintanyagan nga mag-utang sang P160,000 sa Land Bank ukon Development Bank of the Philippines nga amo ang pagagamiton nga down payment sa bag-o nga unit sang modernized jeepney apang dapat nila nga isurrender ang ila Official Receipt (OR) kag Certificate of Registration (CR) kag ang la daan nga jeep.
Suno pa diri, indi man mabutangan sang pangalan ang bag-o nga jeep kay iya na ina ka kooperasyon.
Suno pa sa iya, gin-implementar lang ang modernization program apisar nga wala nag-agi sa insakto nga proseso, wala information dissemination, wala nagpatigayon sang public hearing kag wala man nag-agi sa local government unit, Kamara kag Senado.
Magluwas diri, wala man ginakilala sang Land Transportation Franchising and Regulatory Board (LTRFB) 6 ang transport sector suno kay Malacad bangud wala sila gin-imbita sa ginpatigayon nga meeting sang tinalikdan nga semana kaupod si Councilor Al Victor Espino apisar nga sila ang kabahin sang commerce and industry kag nagabayad sang tax kag permit.
