Ginpatay kaina sang aga ang amay sang doktor nga nangluthang sa sulod sang Ateneo de Manila University sa Quezon City sang Domingo kun sa diin tatlo ang patay lakip na ang anay alkalde sang Lamitan City, Basilan.
Sa interview sang Bombo Radyo Bacolod kay Police Lt. Eirene Mazon, spokesperson sang Police Regional Office Bangsamoro Autonomous Region in Muslim Mindanao, ang amay ni Dr. Chao-Tiao Yumol nga si Rolando ang ginpatay sa atubang mismo sang ila nga balay sa Barangay Maganda, Lamitan City, Basilan.
Ang amay nga Yumol ang gintiro sang riding-in-tandem suspects sa atubang mismo sang clinic ni Chao-Tiao nga People’s Clinic alas-6:40 sang aga.
Suno diri, ang biktima nga retired member sang Philippine Constabulary ang nag-agom sang apat ka igo sang bala sa likod.
Gindala pa ini sa Lamitan District Hospital apang gindeklarar nga dead on arrival.
Suno kay Mazon, caretaker lang ang kaupod sang biktima sa ila balay bangud ang misis sini kag iban nga miyembro sang pamilya ang yara sa Manila.
Sa karon, padayon pa ang imbestigasyon agud matumod ang motibo kag identity sang mga suspetsado.
Nagapati naman ang mga residente nga mahimo vendetta ukon may kaangtanan ini sa pagpatay ni Chao-Tiao kay former Lamitan City Mayor Rosita Furigay sa Ateneo.
Ang killing ang natabo lima ka adlaw matapos nga ginpatay sang doktor ang anay alkalde si Rosita Furigay , iya nga aide nga si Victor Capistrano kag Ateneo security guard Jeneven Bandiala kadungan sang graduation kuntani sangt Ateneo Law School.
