Ginalantaw sang consultant ni Bacolod City Mayor Alfredo Benitez sa disaster management nga halos 50 porsyento sang cctv cameras nga gin-install sa syudad sang Bacolod ang indi functional.
Sa interview sang Bombo Radyo Bacolod kay anay councilor Homer Bais, amat-amat na nila nga nausisa ang mga cctv cameras nga ginagamit sang syudad sa pagmonitor sang sitwasyon ilabi na kun magi-nulan agud makita kun sa diin nga bahin ang ginabaha apang kun ini ang maglantaw halos 50 porsyente sang cctv ang wala nagafunction kag wala nagamit sa nagakadapat nga gamitan.
Gin-inventory man sang mga ini ang salakyan nga yara sa idalom sang Disaster Risk Reduction Management Office (DRRMO) sang syudad.
Suno kay Bais, naluoy siya sa anay mga pinuno sang nasambit nga opisina bangud sa nakita kag nahibaluan sini nga ang syudad ang nagabakal sang gamit para sa DRRMO apang nagaissue lamang ang opisina sang memorandum receipts (MR) kag ang nagagamit sang salakyan ukon equipment sang city engineering office sang syudad.
Aminado man ang anay konsehal sang syudad nga dako ang mabulig sang mga cctv cameras kun functional lamang ang tanan bangud makabulig ini sa mga kapulisan para sa mas madasig nga pagresponde sa tion nga may krimen kag sa pagsolbar sang kaso.
Ginpahayag man ni Bais nga ang opisina sang alkalde ang may yara man sang kaugalingon nga plano para sa cctv cameras.
Suno pa diri dapat ang nagapungko kag nagamonitoring sa cctv cameras ang dapat may training kun paano makay-o ang mga wala nagafunction nga installed cctv cameras.
Suno diri, tun-an pa nila sa karun kun paano maupgrade ang functionality sang cctv agud magagamit para sa kabilugan.
Samtang, ginpahayag man sini nga igalunsyar liwat ang earthquake drill bangud mas maayo nga may ihibalo ang mga pumuluyo kag marefresh ang mga ini sa mga pagahimuon sa tion nga may linog.
