42 ka mga applicant agud mangin traffic enforcer sang Bacolod Traffic Authority Office (BTAO) ang wala nakasulod ukon nakakuha sang poor nga rating sa evaluation test, suno sa pinuno sang BTAO.
Sa interview sang Bombo Radyo Bacolod kay Police Major Junji Liba, sa 270 ka mga applicants, 42 ang wala nakapasar sa quantitative evaluation test.
Suno kay Liba, ang mga nakapasar ang mangin kabahin na sang BTAO kag ang wala ang igarefer sini sa iban nga department sang ciudad kun sa diin sila nagakaangay.
Suno kay Liba, naluoy man siya sa mga nataktak apang ginahimo lamang sini ang iya trabaho agud nga masiguro nga may kapasidad ang mga BTAO personnel sa pagdeliher sang trapiko sa syudad sang Bacolod.
Agud nga madugangan ang mga nakapasar nga mga personnel sang BTAO magakuha man si Liba sang 50 sa 190 ka mga reserved personnel apang iya man ini nga igapaidalom sa evaluation test antes ideploy.
Ginpahayag man ni Liba nga wala man ini sang personal interest kag ginascreening sini ang mga traffic enforcers agud nga masiguro ang mga nagakadapat nga ibutang sa dalanon sang syudad agud nga magbantay sang trapiko.
