Nagpanugyan ang gobernador sang Negros Occidental nga edukaron ang kaugalingon angot sa monkeypox agud nga makalikaw nga malatnan sini.
Nahibaluan nga may yara man na sang isa ka kaso sang monkeypox sa Pilipinas kag ini ang nakapadulong sa mga lugar nga may kaso sang nasambit nga balatian.
Ang monkeypox ang isa ka mild viral infection nga ginakabig endemic sa pila ka bahin sang west kag central Africa.
Ini ang nagalapta paagi sa close contact kag ang mga outbreaks ang makit-an lamang sa pila ka bahin sang kalibutan apang kalabanan sa mga ini ang nareport sa Europe.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, wala pa sang ginpain nga pasilidad ang probinsya para sa isolation facilities para sa monkeypox.
Suno kay Lacson may yara sang 30 rooms nga ginagamit para sa isolation facilities sang COVID-19 sa COVID hospital sang probinsya mahimo man ini magamit sa monkeypox ingkaso nga may mainfect sa probinsya apang kaangay sang chicken pox mahimo man nga mag-isolate sa balay.
Mahimo man nga magamit nga treatment facility ingkaso ang Cadiz City District Hospital.
Nagpanugyan ang gobernador nga maghalong kag mangin vigilante sa tanan nga tion.
Hibaluon ang facts sang monkeypox kag dapat man maghalong sa mga layaw nga sapat bangud santo sa research indi lang sa amo ukon monkey makuha ang balatian bangud mahimo man ini makuha sa iban nga mga sapat.
Dugang sa panugyan sang gobernador ang pagpabilin sang pagsuksok sang facemask kag ipadayon ang pagpanghugas sang kamot kasubong man ang pagdisinfect.
