Ginpahayag sang Brigada Eskwela coordinator sang Andres Bonifacio Elementary School 1 (ABES 1) nga 100 percent na sila nga preparado sa pagbukas sang klase sa Agusto 2.
Sa interview sang Bombo Radyo Bacolod kay Mrs. Lunel Sapotin, nagligad nga semana nagpreparar na sila para sa kick off sang Brigada Eskwela para sa School Year 2022-2023 nga may tema “Brigada Eskwela: Tugon sa Hamon ng Ligtas na Balik Aral”.
Kadungan sang kick off sang Brigada Eskwela, may yara sila sang ginpatigayon nga opening program.
Suno kay Sapotin, may yara man sila sang mga bisita nga mga barangay kagawad kag presidente sang Parents Teachers Asssociation (PTA) sang ABES 1.
Suno pa diri, may nagkadto man sa ABES ang pila ka mga punong barangay apang nagbilin lang sang ila donations kag wala nagpakigbahin sa opening program.
Magalawig naman sang isa ka semana ang brigada eskwela.
Kada adlaw, lain-lain naman nga mga ginikanan ang makigbahin sa Brigada Eskwela.
Kaina, may katapo sang Philippine Army nga nagvolunteer agud nga magrepair sang mga bangko sa ABES 1.
May yara man sang naghimo sang murals kag nagpangtakod sang audio visuals.
Nagpanawagan man ini sa mga ginikanan nga makadala sang mga magamit kaangay sang pinta ukon iban pa nga gamit nga magamit para sa Brigada Eskwela.
May yara naman sang may Brigada Eskwela contest para sa small, medium kag big schools.
