Ginkompirmar ni Bacolod City Mayor Alfredo Benitez nga patigayunon na sa bulan sang Oktobre ang Masskara Festival.
Sa interview sang Bombo Radyo Bacolod kay Mayor Benitez, madayon na ang selebrasyon sang syudad sang Masskara Festival.
Ini ang pagahiwaton sa ikatlo nga semana sa bulan sang Oktubre.
Suno kay Benitez, may yara naman ini sang mga plano para sa pagtigayon sang Masskara Festival.
Ginpahayag man sang alkalde nga dal-on sini ang imbetasyon para sa Masskara Festival sa Metro Manila paagi sa road show agud nga makaganyat sang mga investors nga mag-invest sa syudad sang Bacolod kag dugang nga mga sponsors para sa nasambit nga event matapos nga duha man ini ka tuig nga wala ginhiwat.
Ginpahayag man ni Benitez nga mahimo nga ibuhinan ukon cluster nalang ang magpaindis-indis sa Masskara agud indi man maayawan sa paglantaw ang mga tawo kun 61 ka barangay ang magpasakop sa kompetisyon.
Wala pa man mahibaluan kun pagadal-on para sa roadshow ni Benitez sa Metro Manila ang Masskara dancers.
Balantayan sa karun ang iban pa nga plano sang alkalde para sa paghiwat sang Masskara sa bulan sang Oktubre.
