Ginakasubo sang grupo sang mga manunudlo ang naggwa nga report sang Commission on Audit nga overpriced kag outdated ang mga laptop nga ginbakal sang DepEd sang tuig 2021 gani sila ang nagalaom nga mapaathag ini sang departamento.
Suno kay Richard Gelangre, presidente sang Bacolod City Public School Teachers Federation, ang DepEd ang dapat nga modelo sang honesty bangud ini ang policy sang departamento.
Apang kun COA mismo ang naghambal nga indi P58,000 ang bili sang isa ka laptop kundi P20,000 tubtub P25,000 lamang, indi man ini mabutigan bangud madamo ang nagagamit sang laptop kag madamo ang IT experts nga makatumod sang kadasigon sini santo sa specifications.
Suno kay Gelangre, dapat nga ipaathag sang DepEd sa mga manunudlo kag sa publiko ang tuman kadako nga diperensya sang presyo sangsa prevailing price.
Aminado si Gelangre nga tanan nga mga manunudlo ang dapat nga may laptop bangud duha ang modality sang reporting subong – hard copy kag soft copy – kag dasigay man ang submission.
Kun wala sang laptop ukon wala sang internet ang manunudlo, mareprimand ini sa mga report nga indi mapasa.
Suno sa principal sang Bacolod City National High School, kinahanglan nila sang madasig nga laptop bangud atrasado ang trabaho kun naga-lag ang gadget.
Panindugan ni Gelangre, dapat nga mapaathag gid sang DepEd ang presyohanay bangud nauyang ang pondo sang gobyerno.
