Ginpaathag sang former chairperson sang Sangguniang Panlungsod sang Bacolod nga anay miyembro man sang Local School Board nga ginatun-an sang Technical Working Group ang bentaha ukon disbentaha sang mga gadget nga ginabakal sang gobyerno antes ang procurement.
Sa interview sang Bombo Radyo kay City Councilor Renecito Novero, indi na ini makadumdom sang exact amount nga ginpain sang Local School Board kag kun pila ka gadgets ang ginbakal sang ginpatuman ang blended learning bangud sa COVID pandemic.
Suno kay Novero, ang laptops kag tablets ang ginhatag sa mga manunudlo nga nagatudlo sang special classes ilabi na sa Bacolod City National High School.
Ang nasambit nga pondo ang nagikan sa Special Education Fund.
Suno sa konsehal, wala naflag sang COA ang nasambit nga procurement.
Aminado ini nga ang bili sang laptop ang nagadepende sa purpose sini apang wala ini sang ideya kun pila ang bili sang ginbakal sang Local School Board bangud tubtub lamang sa appropriation ang trabaho sang Sangguniang Panlungsod.
Ang Local School Board naman ang naga-evaluate sang kinahanglanon sang isa ka requesting school, nagalantaw kun may pondo para diri, tubtub nga ini ang maaprubahan sang board kag maendorso sa Office of the City Mayor.
Antes baklon ang isa ka gadget suno kay Novero, ginalantaw ang presyo sini, specifications, kapasidad sang supplier nga magdeliver kag ini ang ginatun-an sang Technical Working Group.
