Magahulat lang ang Bacolod Traffic Authority Office kun maaprubahan ang ginaduso nga No Garage, No Registration Bill nga magarequire sa mga nagbakal sang salakyan nga mapakita sang pamatuod nga may yara ini sang parking space antes marehistro ang motor vehicle sa Land Transportation Office.
Ang House Bill No. 31 ang ginfile ni Marinduque Rep. Lord Allan Velasco nga amo man ang former House speaker.
Santo sa hagna, ang mga residente sa Metro Manila, Angeles, Bacolod, Baguio, Batangas, Cagayan de Oro, Cebu, Dagupan, Davao, Iloilo, Naga kag Olongapo nga nagaplano nga magbakal sang salakyan ang kinahanglan nga makaprovide sang proof of permanent parking space paagi sa affidavit nga gin-acknowledge sang notary public.
Ang nasambit nga affidavit ang igapresentar sa LTO bilang prerequisite sa registration.
Igarevoke naman ang registration sang indi makacomply, masuspend sa pagparehistro sang motor vehicle sa idalom sang iya ngalan sa sulod sang tatlo ka tuig kag may multa nga P50,000 kada violation.
Sa interview sang Bombo Radyo kay BTAO head Police Major Junji Liba, 80 percent sang car owner ang nagagamit sang dalan bilang parkingan.
Aminado ini nga may kabudlayan sa implementasyon kun ini ang mangin layi apang magadepende ini sa implementing rules and regulations.
Wala man sini ginadula ang posibilidad nga mahimo indi ini solusyon sa pagdecongest sang trapiko bangud indi pat-ud kun ano ang himuon sa mga salakyan nga wala sang registration.
