Dako ang ginsaka sang presyo sang kalamay nga ginabaligya sa mga merkado sa Bacolod samtang nagahilapit man ang pagsugod sang milling season.
Sa interview sang Bombo Radyo kay Aira Jacinto, nagabantay sa store sang ila nga pamilya sa Libertad Public Market, kada semana ang pagsaka sang presyo sang kalamay.
Tinalikdan nga semana, ang dark sugar ang nagabili sang P60 kada kilo apang nagsaka ini sa P68 subong nga semana.
Ang washed sugar nga nagsaka sang P5 halin sa P65 padulong sa P70; ang white sugar ukon refined sugar ang nabili sang P95 nagikan sa P80; samtang ang muscovado naman ang nagabili na sang P70 halin sa P65.
Suno kay Jacinto, diutay nalang ang supply sang kalamay gani nagsaka ang bili sang ginadeliver sa ila nga nagresulta man sa ila nga pagpamahal.
Ang delivery kanday Jacinto ang nagikan sa La Carlota kag Victorias City apang nagasaka ang presyo sang isa ka sako kada semana.
Suno diri, wala man sang may mahimo ang nagabakal kundi nagaadjust nalang sa ila nga baligya.
Kalabanan naman nga ginabakal sang mga kustomer ang isa ka kilo, tunga kag 1/4 kilo.
