Nagdala ang Bombo Radyo kag Star FM sang kalingawan kag papremyo sa Libertad Public Market kaina sang aga kadungan sang una nga market draw sang Enhanced Swerte sa Palengke Promo 2022.
Anom ka mga entry senders ang maswerte nga nagdaog sang P500 cash kag P500 nga balor sang gift pack, samtang may mga papremyo man sa nagkalain-lain nga parlor games kag videoke challenge.
Ang mga nagdaog sang P500 cash kag P500 worth sang gift pack amo sanday Mauro Martir sang Barangay Pahanocoy, Bacolod City; Kayla Mawa sang Barangay 35, Bacolod City; Jose Grate sang Barangay 40; Rachelle Dela Pedra sang Barangay Handumanan; Lorna Pacto sang Bago City; kag Romela Villarosa sang Barangay Estefania, Bacolod City.
Ang premyo ang gilayon nila nga nabaton pagkatapos sang draw.
Sa interview kay Romela Villarosa pagkatapos sang draw, tuman ang pasalamat sini sa nadag-an nga P500 nga cash kag P500 nga balor sang gift pack.
Ini ang una nga kahigayunan nga nagdaog si Villarosa apang madugay na ini nagapasakop sa mga promo sang Bombo Radyo.
Suno diri, ibakal niya sang kinahanglanon sa sulod sang balay ang iya nadag-an kaangay sang 10 ka kilo nga bugas.
Gin-imbitar man sini ang iban nga mga pumuluyo nga mag-intra sa mga promo sang Bombo Radyo agud nga magdaog man sang dalagko nga papremyo.
Magahulog man ini sang madamo nga entries agud nga magdaog sa grand draw.
Suno kay John Paul Tamayo – job order casual sang Bacolod City government nga assigned sa Libertad Public Market, nag-enjoy ini nga sa Libertad Market ginpatigayon ang una nga market draw sang promo.
Nasaksihan naman sini ang pag-enjoy sang mga tagpasakop sa parlor games, pahampang kag sa raffle draw.
Ginpabugal naman sini nga malimpyo sa karon ang merkado bangud mapisan ang mga market cleaners.
