Ginpahayag sang punong barangay sang Barangay Banago diri sa ciudad sang Bacolod nga 80 porsyento ukon kalabanan nga nagapuyo sa coastal areas sang nasambit nga barangay ang indigents ukon mga pigado gid.
Sa interview sang Bombo Radyo kay Ricky Mijares, maayo man ang ginapropose ni Bacolod City Councilor Vladimir Gonzales nga low cost housing apang ang ginalantaw naman nga indi masarangan ang bulanan nga balayran sang mga occupants.
Suno diri, nakapadulong na ang konsehal sa barangay agud makighinun-anon angot sa proposal.
Suno kay Mijares, dapat may public hearing kun madayon ang proposal agud nga mahibaluan man kun ano ang pulso sang mga pumuluyo angot sa proposal.
Wala pa man mahibaluan kun sa diin nga bahin sang barangay ipatindog ang low cost housing project bangud wala pa man nakahambal ang konsehal kun sa diin.
Apang may yara sang property si Councilor Gonzales sa Purok Bayanihan sa nasambit nga barangay.
Suno sa punong barangay, ugyunan sini ang programa kun para sa kaayuhan sang mga pumuluyo bangud 80 porsyento sa mga pumuluyo diri ang mga indigents.
Kalabanan man nga ginakuhaan sang pang-adlaw adlaw nga kinahanglanon sang mga pumuluyo ang yara sa dagat.
