Patay ang driver sang motorsiklo samtang pilason naman ang backrider sini matapos aksidente nga nagbunggo ang ila ginasakyan nga motorsiklo sa nakapark nga truck sa National Highway sang Hacienda Tinihaban, Barangay San Jose, EB Magalona sang Agosto 6, alas-10:10 kagab-i.
Sa impormasyon nga nakuha sang Bombo Radyo, ang nagamaneho sang motorsiklo ang ginkilala kay Vince Frederick Terencio, 17-anyos samtang ang backrider sini amu si Vincent Biñas, 18-anyos, lunsay mga residente sang Purok Katumbal, Barangay San Jose, EB Magalona.
Samtang nagausoy ang mga ini sa dalan, aksidente nga nabungguan ni Terencio ang likod sang isa ka Mitsubishi Truck nga nakapark kag nagaatubang sa north nga direksyon sa outerlane.
Ang driver sang nasambit nga truck amu si Alex Nicavera, 52-anyos, residente sang Barangay Sta. Cruz, Murcia.
Bangud sa kakusog sang impact, nakaangkon sang damage ang duha ka mga salakyan.
Si Biñas ang nagsuprer sang pilas sa nagkalain-lain nga bahin sang iya lawas samtang si Terencio naman ang gindeklarar nga dead on arrival.// Sa karun si Nicavera ang yara sa kustodiya sang EB Magalona Municipal Police Station.
