Ginahulat na lamang sang Andres Bonifacio Elementary School (ABES) 2 nga maschedule sila kag mainspection sang Bureau of Fire Protection (BFP) agud nga makompleto ang ila nga requirements para sa preparasyon sang face to face classes para sa School Year 2022-2023.
Sa interview sang Bombo Radyo Bacolod kay Genelyn Masitas, principal sang ABES 2, ang mga katapo sang BFP ang nagapadulong sa eskwelahan agud nga mag-inspect sang wirings sang kuryente kag mga gin-install nga fire extinguishers nga naplastar naman sa classrooms.
Suno kay Masitas, ang mga BFP personnel ang may yara na sang ila nga check list nga ginadala sa tion nga mag-inspection kag sila man ang nagatumod kun may kulang ukon wala antes hatagan sang Fire Safety Inspection Certificate ang eskwelahan.
May yara naman sang personnel ang ABES 2 nga maayo sa electrical nga masami nga nagatsekyar sa mga linya sang kuryente sa eskwelahan agud masiguro nga wala sang faulty wires.
Sa karun, nagahulat pa sila sang schedule for inspection sang BFP agud macompleto ila requirements para sa preparasyon sa face to face classes.
Samtang, nagapadayon naman ang enrollment apisar nga may training sila nga mga manunudlo bangud ang mga non-teaching personnel sang eskwelahan ang gintugyanan nga magproseso sa requirements.
Nagapanawagan man ini sa mga pumuluyo nga nagapadayon pa ang ila Brigada Eskwela kag nagakinahanglan pa sila sang gamit para diri.
