Magapangatubang sang kaso nga reckless imprudence resulting to homicide and damage to property ang driver sang tricycle kag carry nga imbulbado sa pagbunggo-patay sa isa ka security guard sa Barangay Alijis kahapon sang hapon.
Sa interview sang Bombo Radyo Bacolod kay Police Captain Elmer Bonilla, station commander sang Police Station 7, nga kahapon sang hapon, ginpasaka na ang kaso nga reckless imprudence resulting to homicide and damage of property batok sa tricycle driver nga si John Dayday, 23-anyos, sang banwa sang Cauayan kag kasubong man sa nagamaneho sang multicab nga si Warren Blance, 42-anyos, sang Barangay Pahanocoy.
Suno kay Bonilla, ang asawa sang biktima nga si Louie Vergara, 41-anyos, security guard sa University of Negros Occidental Recoletos (UNO-R) kag residente sang Barangay Handumanan ang nagpasaka sang kaso batok sa duha.
Nalakip sa ginpasakaan sang kaso si Blance bangud may partisipasyon man ini sa nagluntad nga insidents.
Suno sa station commander ang driver sang carry ang nagrequest sang preliminary investigation kag ini ang ginpasugtan man sang fiscal bangud mahimo nga ginpakita sini ang kuha sang dash cam sang iya salakyan.
Suno kay Bonilla, si Blance, ginhatagan sang napulo ka adlaw agud nga mapamatud-an nga wala ini sang sala sa nagluntad nga insidente.
Sa karun detained si Dayaday sa police station 7 samtang si Blance ang ginrelease bangud sa napulo ka adlaw nga ginhatag sang fiscal nga preliminary investigation agud nga mapamatud-an nga wala ini sang kahilabtanan sa aksidente.
Madumduman nga nag-head-on collision ang tricycle kag motorsiklo ni Vergara sa diin ini ang nagtabog kag nag-igo sa multicab nga gintunaan sang kamatayon sini.
