Nagpaandam ang pinuno sang National Bureau of Investigation (NBI)-Bacolod sa mga parokyano nga nagataya sa numbered games matapos nga sa probinsya sang Negros Occidental kag syudad sang Bacolod, isa lamang ang may yara sang franchise sa pagpatigayon sang numbered games kag ini ang super lucky beagler.
Ini kasunod sang nadakpan nga duha ka persona nga illegal nga nagapataya sang Small Town Lottery (STL) sa Libertad Public Market sa syudad sang Bacolod sang Biyernes, Agosto 5.
Nahibaluan ang nga gindakop sang National Bureau of Investigation (NBI)- Bacolod Arkens Espida kag Reynne Lopez yara sa legal nga edad kag lunsay mga residente sang syudad sang Bacolod matapos madakpan nga wala sang lisensya nga nagapataya sang Small Town Lottery ( STL) sa Libertad Market sang Biyernes sang aga.
Suno kay Atty. Renoir Baldovino ang duha nga nagkaladakpan ang indi konektado sa lisensyado nga nagaoperate sang numbered sa syudad.
Kasunod sini nagpagwa ang mga ini sang pahanumdom bangud ang luyag lamang sang ahensya nga maproteksyunan ang mga pumuluyo sa pagtaya sa mga illegal operators sang numbered games bangud sa tion nga magdaog ang mga ini wala sila sang lagson bangud wala sang lisensya ang ila nga gintay-an.
Nakagwa naman sanday Espida kag Lopez matapos nga ginbayran ang ila pyansa matapos nga ang mga ini ang napriso sa paglapas sa section 3 sang Republic Act 9287 ukon an act increasing the penalties for illegal numbers games.
Wala naman nakahibalo si Baldovino kun sin-o ang nagbayad sang pyansa sang duha bangud sa korte na ini ginbayran.
Ang pyansa ni Espida ang P72,000 samtang kay Lopez ang P60,000.
Ginahibalo pa sang NBI-Bacolod kun sin-o ang financier ukon bangkador sang duha nga mga nagkaladakpan sang NBI-Bacolod nga illegal nga nagapataya sang STL.
Suno sa pinuno sang NBI-Bacolod ang illegal gambling ang wala lamang nagaoperate sa syudad sang Bacolod kundi sa iban man nga bahin sang probinsya sang Negros Occidental.
