Aminado ang isa ka sugar industry leader nga dako ang kapaltahan ang ginhimo sang mga opisyales sang Sugar Regulatory Administration nga pag-approve sa sugar order nga magapahanugot sang importasyon sang kalamay bisan indi man si President Bongbong Marcos ang nagpirma sini.
Una na nga ginpahayag sang SRA nga aprubado na ang importasyon sang 300,000 metric tons sang kalamay apang kahapon, ginapahayag sang Malacanang nga ginbasura ni Marcos ang nasambit nga proposal kag indi siya ang nagpirma sa order.
Sa interview sang Bombo Radyo kay Manuel Lamata, presidente sang United Sugar Producers Federation, nakibot ini sang nabatian nga ginpirmahan sang iban nga tawo ang ngalan sang presidente.
Suno kay Lamata, dapat nga may mabug-at nga pina sa tuman kaisog nga nagpeke sang ngalan sang chief executive nga amo ang chairman sang SRA Board.
Santo sa una nga document, si DA Usec Leocadio Sebastian ang nagpirma sa pihak sang presidente.
Bangud nagpagwa ang Malacanang sang pahayag nga indi iya sang presidente ang pirma, indi niya otorisado ang pirma ni Sebastian.
Ginpanindugan man sini nga indi matuod nga wala na sang supply sang kalamay gani nagsaka ang presyo.
Suno sa iya, naintindihan sang mga planters ang reklamo sang mga konsumidor nga tuman kamahal ang presyo sang refined sugar nga nagadangat na sa P98 tubtub P100 kada kilo.
Suno diri, indi matuod nga wala na sang supply sang kalamay santo sa pahayag ni SRA Administrator Herminigildo Serafica.
Panindugan ni Lamata, wala na kuntani sang pwede nga mabakal sa merkado kun wala sang supply apang sa karon, madamo man ang supply, nagsaka lang ang presyo.
Nagapati si Lamata nga may nagahampang ukon nagahingalit sang kahigayunan nga mahal ang presyo.
Sa karon suno kay Lamata, nabaligya na sang planters ang tanan nga kalamay tatlo ka bulan na ang nakaligad gani ang tanan nga kalamay ang yara na sa karon sa mga trader kag pila ka bodega sang mga miller.
Suno sa UNIFED president, natumod kuntani sang SRA kun pila pa ang imbentaryo sang kalamay kun ila nga ginpasurvey ang mga bodega sang mga trader apang wala ini ginhimo sang ahensya.
