Ginkumpirmar sang commander sang 303rd Infantry Brigade nga residente man sang Himamaylan ang napatay kadungan sang engkwentro nga nagluntad sa tunga sang mga rebelde kag 94th Infantry Battalion sang Philippine Army sa Sitio Bulasot, Barangay Buenavista, Himamaylan City kahapon sang aga.
Suno kay Brigadier General Inocencio Pasaporte, indi magnubo sa 20 ka mga miyembro sang NPA ang naengkwentro sang 94th IB.
Ang mga rebelde ang ginapatihan nga miyembro sang Central Negros II.
Wala naman sang may nasamaran sa mga suldado matapos ang 40 minutos nga pagbayluhanay sang lupok.
Sa clearing operation, nakita ang bangkay sang NPA nga isa ka lalaki kag narekober man ang isa ka M16 nga may magazine kag mga bala.
Nasapwan man ang hayob-hayob sang mga rebelde nga may personal nga kagamitan kag subersido nga mga dokyumento.
Kaina lang sang kaagahon napapanaog na ang bangkay sang rebelde bangud tuman kadamol ang ulan kahapon sang hapon.
Ginahulat naman sa karon nga maclaim sang iya pamilya ang bangkay nga yara sa karon sa punerarya sa ciudad sang Himamaylan.
Suno kay Pasaporte, naidentify na ang lalaki nga napatay kag residente man sang Barangay Buenavista, Himamaylan City kag ginabanta nga nagaedad sang 20 tubtub 30 anyos.
Suno sa brigade commander, ipalayag nila ang ngalan sang napatay kun maclaim na sang pamilya ang iya bangkay bilang pagrespeto sa iya pamilya.
