Balantayan sa karon kun ano ang mangin desisyon ni President Bongbong Marcos nga amo man ang concurrent secretary sang Department of Agriculture angot sa iban nga miyembro sang Sugar Board nga nagpirma sa Sugar Order No. 4 nga nagapahanugot sang importasyon sang 300, 000 metric tons sang kalamay.
Sa interview sang Bombo Radyo kay former SRA administrator Rafael Coscolluela, madamo ang nagatuad nga desente nga sahi sang opisyal si DA Undersecretary Leocadio Sebastian nga nagpirma on behalf sang presidente gani mabudlay intindihon nga gin-appoint siya sang presidente kag gingamit niya ang otoridad nga ginhatag sang concurrent DA secretary apang ginkwestyon ang iya pagpirma.
Suno sa anay SRA administrator, mahimo nga may yara lang sang misinterpretation sa direktiba nga ginhatag ni Executive Secretary Atty. Victor Rodriguez kag ni Marcos.
Bangud desente nga tawo si Sebastian, boluntaryo ini nga nagrelinquish sang designation bilang tiglawas sang DA secretary sa Sugar Board.
Santo sa sulat ni Sebastian, wala ini nagresign bilang DA undersecretary kundi nagbuya ini bilang representative sa SRA Board kag nakadepende na ini sa presidente kun iya nga batunon ang resignation.
Bangud gin-ako ni Sebastian nga siya ang responsable, ginahulat sa karon kun ano ang mangin desisyon para sa iban nga miyembro sang SRA board nga nagpirma sa sugar order.
