Nagpanugyan ang iloy sang pitcher sang Negros Occidental Little League softball team nga himuon ni Jacey Pajotal ang tanan agud nga magdaog sa 2022 Little League Softball World Series sa Greenville, North Carolina agud nga mangin bugal man ini sang Pilipinas kag indi lang sang ila pamilya.
Ini matapos nga nakasulod na sa semifinals sang World Series ang Team Negros.
Sa interview sang Bombo Radyo kay Juliet Lobaton Pajotal, nalipay ini bangud nakahampang sa international stage ang anak sini kag halos tanan man nga anak sini ang nagahampang sang softball.
Walo pa lang katuig si Jacey sang naghampang na sang softball sa syudad sang Bago.
Suno kay Juliet, si Jacey ang nag-umpisa sa paghampang bilang short stop tubtob nga nagtraining ini bilang pitcher.
Suno sa iloy ni Jacey, wala man sang selection nga natabo bangud ang team ang nagahampang na nga daan kun sa diin gintrain sang private sector kag ginsuportahan sang provincial government sang Negros Occidental apang ang mga ini ang nag-in house sa Bacolod City National High School para sa training.
Malipayon nga bata si Jacey kag ini man ang nagaguide sa iya mga kaupdanan.
Indi man matakos ang kalipay sini bangud halos tanan nga mga kabataan sini ang nakasulod sa softball team kag nagahampang para sa Pilipinas.
Wala man ang mga ini sang libog bangud ginsabat sang provincial government ang gasto sa training kag pagpadulong sa Greenville, North Carolina agud maghampang sang 2022 Little League Softball World Series.
Samtang tuman man ang kalipay ni Nelon Pajotal, amay ni Jacey nga halos tanan sini nga mga kabataan ang naghampang sang softball kag ginapabugal gid sini ang iya anak.
Ginpahayag man sini nga mapagsik kag athletic si Jacey.
Indi matakos ang kalipay sang iloy sang catcher sang Negros Occidental Little League softball team matapos nga makahampang ang anak sini sa 2022 Little League Softball World Series sa Greenville, North Carolina kag sa karon, sila ang nakasulod na sa semifinals.
Sa interview sang Bombo Radyo Bacolod kay Asuncion Solatoria, iloy ni Krystal Lobaton, wala sini ginalauman nga mangin catcher ang anak sini kag maghampang sang softball bangud wala sang bisan isa sa ila nga nagahampang sang nasambit nga sports.
Una nga naghampang bilang Second Baseman si Krystal tubtob nga nagtraining ini bilang catcher.
Suno kay Asuncion, ang iya anak ang nahagaran lamang nanday Jacey Pajotal nga maghampang sang softball nga amo man ang iya pakaisa.
Suno diri, nakita man sini nga mabudlay ang training apang nagapadayon ang anak sini bangud pursigido nga maghampang.
Wala man sang ginpagwa nga kwarta ukon gasto ang mga ginikanan sang Negros Occidental Little League softball team bangud ini ang pribado nga team kag ginasuportahan sang provincial government sang Negros Occidental.
Sa coach lamang sila nagakuha sang update sa ila mga kabataan bangud indi makauyat sang cellphone ang ila mga anak samtang nagahampang.
Nahibaluan nga ang Negros Occidental Little League ang nangin kampyon sa Asia-Pacific Region kag amo ang nagtiglawas sa 2022 Junior League Softball World Series.
