Ginpasalamatan sang sugar industry leaders sa Negros Occidental ang pag-raid kahapon sang mga otoridad sa mga bodega sa Pampanga kag Bulacan nga mahimo ginataguan sang ginahoard nga kalamay.
Sa interview sang Bombo Radyo kay Manuel Lamata, presidente sang United Sugar Producers Federation, ang raid kahapon ang nagapakita nga dapat isurvey gid sang Sugar Regulatory Administration ang mga bodega nga ginabutangan sang kalamay.
Nagapasalamat ini nga ginmandu ni Executive Secretary Victor Rodriguez kag President Bongbong Marcos ang pagpatigayon sang inspection sa mga bodega kag diri nakita nga may yara sang supply.
Suno kay Lamata, madamo pa sang bodega nga dapat iinspection sang mga ahensya sang gobyerno.
Dapat man nga inspeksyunon suno sa iya ang duha ka sugar mill sa Bukidnon bangud mas madamo pa gid nga kalamay ang nastock sa ila.
Suno sa UNIFED president, diutay pa lang ini kun tip of the iceberg pa lang ang ginraid sa Pampanga kag Bulacan kahapon.
Suno diri, madamo ang dalagko nga mga bodega sa Bulacan, Caloocan kag Batangas.
May nakumpiskar naman nga smuggled sugar nga gindiskarga sa isa ka barko sa Subic.
Suno kay Lamata, kun indi matapna ang illegal nga buluhaton, pierde gid ang local nga sugar industry.
Magluwas sa Subic, may yara man sang reported smuggling sa Mindanao kag iban nga bahin sang pungsod.
Kinahanglan man nga ipaathag sang industrial users ang ila pahayag nga wala na sila sang magamit nga kalamay nga kadamo pa man sang imported refined sugar sa mga bodega.
Suno kay Lamata, isa ka tuig ang shelf life sang refined sugar samtang anom tubtub pito ka bulan naman ang shelf life sang raw sugar
