Aminado ang Philippine Coast Guard nga mangin sila ang nakibot man nga may nakasulod sa Cabilang-bilangan Reef sa Barangay Sicaba, Cadiz City, Negros Occidental kun sa diin trahedya ang gindangatan sang excursion sang magpamilya kahapon matapos nga apat ang nalumos.
Ginkilala ang mga biktima nga sanday Marlyne Aguirre, 33 anyos kag ang bata sini nga 15 anyos nga lalaki; Remymar Ocon, 31 anyos; kag 13 anyos nga bata nga lalaki, lunsay mga residente sang Barangay Zone 1, Cadiz City, Negros Occidental.
Sa interview sang Bombo Radyo Bacolod kay Chief Petty Officer Joel Taganile, commander sang Coast Guard Sub-station Cadiz, una nga nalumos ang isa ka menor de edad nga bata ni Aguirre.
Sang nakita sang iloy nga si Marlyn Aguirre, naglumpat man ini sa dagat agud salbaron kuntani ang iya anak apang siya ang nalumos man.
Buligan man kuntani nanday Remymar Ocon kag sang isa ka 13 anyos ang iloy sa pagluwas sa bata apang sila ang nalumos man bangud sa mabaskog nga current sang tubig.
Gilayon man nga nagpatigayon sang rescue operations ang mga rescuers kag Bantay Dagat sang Lakawon kag Sicaba kun sa diin nakuha man ang mga biktima.
Gindala pa ang mga ini sa Cadiz City Emergency Clinic apang wala na matabangan.
Suno kay Taganile, ginadumilian na sang local government unit sa syudad sang Cadiz ang pagpaligo sa lugar bangud isa ini ka sanctuary.
Suno pa diri, nakibot lamang sila nga may yara sang mga tawo nga nagsinadya kag nagpaligo sa lugar kun sa diin nagluntad ang insidente bangud wala ginapahanugutan ang pagsulod kag pagpaligo sa isla.
Ginpahayag man ni Taganile nga ang lugar suno sa mga katigulangan ang mariit kag indi lamang ini ang una nga kahigayunan nga nagluntad ang kaangay nga insidente.
Masami man nga nagaroving ang Coast Guard sa lugar.
Ginbutangan sang tower ang lugar bangud ang isla ang nagakadula sa tion nga mag-200 meters ang taob sa lugar.
Nagpanawagan man ini sa mga pumuluyo ilabi na sa mga ginikanan nga kun maglagaw kag nagasinadya, lantawon kag ibutang sa siguro ang mga kabataan agud indi na masulit ang kaangay nga insidente.
