Ginaimbestigaran sa karun sang Negros Occidental Police Provincial Office ang pagkarecover sang isa ka jacket sang local disaster management office sang isa ka Local Government Unit sa probinsya sang Negros Occidental sa mga gamit nga narekober sa nagluntad nga engkwentro sa tunga sang New People’s Army kag tropa sang 94th Infantry Brigade sang Philippine Army sa Barangay Oringao, syudad sang Kabankalan, Negros Occidental.
Suno kay Police Captain Judesses Catalogo, spokesperson sang Negros Occidental Police Provincial Office, mahimo nga ginkawat lamang ang nasambit nga bayo ukon ginhatag bangud nagakatabo gid man ang paghatag sang nasambit nga panapton apang ini pa ang sentro man sang ila nga ginapatigayon nga imbestigasyon agud matumod kun empleyado sang nasambit nga LGU ang tag-iya sang panapton.
Nagalaom man ang pamunuan sang NOCPPO nga indi empleyado sang Barangay ukon LGU ang nagapanag-iya sang panapton bangud ini ang makaapekto sa conflict of interests.
Ginpahayag man ni Catalogo nga mas maayo kuntani kun ang panapton ang pangalan nga makadirekta sila sa nagapanag-iya agud nga magdasig ang imbestigasyon.
Suno diri, indi man malayo nga ginsuksok lamang sang katapo sang NPA ang bayo agud magdisguise bangud may mga kaso man nga nagasuksok ang mga ini sang bayo sang army kasubong man sang mga kapulisan agud indi man ang mga ini masitaan ilabi na nga may mga gatherings.
Ginahulat man sang mga ini ang resulta sang forensic examination sa mga narekober nga paraphernalia sa encounter site agud nga mahibaluan kun sin-o ang nagapanag-iya sini.
