Nakapasa na sang iya sabat sa show cause order ang Acting Municipal Treasurer sang Isabela nga si Neneth Escarda kasunod sang ginreport sini nga ginkawat ang P3 million nga cash sang local government unit sa ila nga balay sa Barangay Taculing, Bacolod City
Suno kay Provincial Legal Officer Atty. Alberto Nellas Jr., ang sabat ni Escarda na-submit sa sulod sang gintalana nga lima ka adlaw.
Si Escarda gindagdagan show cause order agud magpaathag kun ngaa nadula ang kapin P6.4 million nga cash kag checke nga collection sang banwa sang Isabela.
Pahayag ni Nellas nga ila na pagasuguran ang preliminary investigation kag sa sulod sang 20 ka adlaw, ila iga-resolve kon bala dapat i-formal charge si Escarda ukon indi.
Nahibaluan nga si Escarda ang acting treasurer sang Isabela apang sa ciudad sang Bacolod nagapuyo kag gin-alegar sini nga sadtong January 21, 2023 ginsulod sang kawatan ang ila balay kag ginkuha ang nasambit nga kwarta nga iya gindala bisan wala ini sang authority.
Sa karon padayon nga naga opisina si Escarda sa Provincial Treasurer’s Office bangud wala pa man sang suspension kag formal charge batok sa iya.
