Patay ang asawa matapos gintiro sang kaugalingon nga bana sa Purok Rosal 1, Barangay Zone 10, Talisay City kagab-i.
Ginkilala ang biktima kay Jean Camonias, 40-anyos, samtang ang suspek, ang mismo bana sini nga si Jacinto Camonias, 49-anyos.
Sa interview sang Bombo Radyo Bacolod kay Rodmar Camonias, 16 anyos nga anak sang mag-asawa, natabo ang insidente sa salas sang ila nga balay matapos nag-init ang ulo sang ila amay nga gina-aligar nga nagakumod ang ila iloy samtang nagakaon ini gani gin-aligar sini nga gintiro sang ila amay ang ila nga iloy nga na-igo sa ulo nga gintunaan sang kamatayon sini.
Suno kay Rodmar, ang estorya sang iloy ang may kahilabtanan sa pagparik-parik sini sang napatay ang ila nga Lolo.
Suno diri, masami sila nga ginasakit sang ila nga amay kun ini ang mahubog.
Ginpahayag man sang bata nga sanguna sa syudad sang Sagay napriso man ang ila amay bangud may pinatay man nga tawo apang nakagwa matapos ginpyansahan sang ila nga iloy.
Nagatrabaho sa punong ang suspek.
Suno pa sa bata magluwas nga nagainum sang makahulubog nga ilimnon ang ila nga amay, gin-alegar man sini nga nagagamit ini sang illegal nga druga.
Sa natabo sa ila nga iloy, desido ang mga kabataan nga magpasaka sang kaso batok sa ila nga amay.
Ginpanginwala naman sang bana ang pagtiro sa iya asawa.
Suno kay Jacinto, tuyo lamang sini kuntani nga magpasalba sang iya nga sulpak sa atop sang ila balay apang nagtindog ang asawa sini gani ini ang naigo.
Ginpahayag man sini nga nag-away man sila sang asawa sini bangud sa duta nga ginatindugan sang ila balay bangud luyag nalang sini nga magpauli sa Sagay bangud wala man sila sang iban nga sayluhan kag ang pamilya sang asawa sini ang wala man nagabulig sa ila.
Nagahinulsol na sa karun ang suspek kasunod sang natabo sa iya asawa apang gin-athag sini nga wala niya ini paghungda.
Samtang, sa imbestigasyon naman sang mga kapulisan sang Talisay City Police Station ang mag-asawa ang may ginaaway nga may kaangtanan sa burial benefit sang amay sang suspek nga nagresulta sa mainit nga pagdiskusyunanay kun sa diin ginkuha sang suspek ang sulpak kag gintiro ang biktima.
Sa interview sang Bombo Radyo Bacolod kay Police Lt. Abegael Donasco, public information oficer sang Talisay City Police Station, ang biktima ang naigo sa naidalom nga bahin sang nawala nga nawong nga gintunaan sang kamatayon sini.
Narekober sa lugar ang muzzle sang sulpak kag ginapangita pa ang lawas sini.
Suno kay Donasco, nakahunong na sa Talisay City Police Station ang suspek kag ipaidalom sa inquest proceedings agud nga mapasaka ang ginalantaw nga kaso nga homicide nga may kaangtanan sa Article 9262 ukon Anti-Violence Against Women and their Children Act of 2004.
