Patay ang isa ka lalaki matapos nga ini ang ginluthang sa Phase 2 Block 7 Lot 3, Charito Heights Subdivision, Barangay Granada, Bacolod City alas-9:35 kagab-i nga ginalantaw tuga sang pagpangimon ukon personal nga kaakig.
Ang biktima ang ginkilala nga si Harold John Suarez, 37 anyos, residente sa Hermilinda Subdivision, Barangay Mansilingan.
Samtang ang mga suspetsado ang ginkilala naman nga sanday Matt John Espoli, Rodzel Gonzales Espoli, Mark Torres kag alyas “Kalbo”.
Suno kay P/Capt. Francis Depasucat, hepe sa Bacolod Police Station 5, gilayon nila nga ginresponderan ang insidente matapos nga sila ang nakabaton sang tawag gikan sa concerned citizen.
Naabtan nila ang biktima nga duguon samtang nagahamyangon sa ibabaw sang iya nga motorsiklo, kag sa pag-abot sang medical team, ini ang gindeklarar nga wala na sang kabuhi.
Naabtan man nila ang live in partner sang biktima sa crime scene nga ginkilala lamang kay alyas “Joy”.
Sa inisyal nga imbestigasyon, naga-inom ang biktima sang makahulubog nga ilimnon sa atubang sang isa ka tyangge samtang nakapungko sa iya motorsiklo sang ini ang hinali nalang nga ginpalapitan sang apat ka mga kalalakinhan kag ini ang gintiro sang makatatlo ka beses.
Gilayon naman nga nagsakay ang mga suspetsado sa gina-alegar gin-arkilahan nga Toyota Highlander kag nagpalagyo sa wala matumod nga dereksyon.
Si Joy ang nagatrabaho bilang masahista kag naga-offer sang home service.
Ginalantaw sang mga ini nga mahimo may kaugot ang mga suspetsado sa biktima ukon mahimo man nga pagpangimon ang rasun sa pagpatay.
Aminado naman ang live-in partner nga under probation pa ang biktima bangod sa kaso may-kaangtanan sa iligal nga droga.
Suno kay Depasucat, ang apat ka mga suspetsado ang naga-arkila sang puluy-an sa nasambit nga Charito Heights Subdivision kag ang mga ini ang nagatrabaho bilang ahente sang sigarilyo.
