Si John Ynzon, nga amo ang tag-iya sang salakyan amo man ang amay sang gina-alegar nobya ni Suarez nga si Alyas “Joy”.
Sa interview sang Bombo Radyo Bacolod kay John Ynzon, ang mga suspetsado nga ginkilala nga sanday Matt John Espoli, Rodzel Gonzales Espoli, Mark Torres kag alyas “Kalbo”, ang umpisa nga nag-arkila sa ila balay nga atubang man sang iya ginapuy-an sa Phase 2 Block 7 Lot 3, Charito Heights Subdivision humalin sang Nobyembre.
Apang wala sini nakilala ang mga matuod-tuod nga pangalan sang mga suspetsado bangod hayo lamang ang ginpakilala sa iya.
Humalin sadto, halos adlaw-adlaw naman nga gina-arkilahan sang apat ang ila nga salakyan nga tumalagsahon lamang nila kun ginagamit, apang sa masami ini ang gina-uli man kun hapon kaupod sa bayad.
Ang apat ang nahibaluan sini nga ahente sang kompanya sang sigarilyo kag mga tumandok sa Iloilo.
Gin-athag man ni Ynzon nga indi live-in partner kundi nobyo lamang sang iya bata si Suarez nga residente sa Hermilinda Subdivision, Barangay Mansilingan kag nagakadto lang ini sa ila nga balay sa pagbisita kay Joy.
Paathag pa sini nga kasado ang iya nga bata, apang hamulag sa bana.
Dugang pa ni Ynzon nga bangod nagamasahe ang iya nga bata, kalakip man sa mga kliyente sini ang apat ka suspetsado.
Apang suno diri, nagapangimon si Suarez sa apat kun sa diin sang nagliligad nga semana, ginhaboy sini sang molotov cocktail ukon mitsa nga may unod nga gasolina ang ginapuy-an sang mga biktima sa tinutuyo nga ini ang sunugon.
Ginapakamaayo na lamang ni Ynzon nga sa gate nag-igo ang molotov kag ini lamang ang nagkalayo.
Ginalantaw sini nga mahimo nakakita sang tiyempo ang mga suspetsado sang magbisita ang biktima sa iya nga bata kag ini ang ginbalusan.
Dugang pa sini nga hinali na lamang gindala sang mga suspetsado ang salakyan nga masami man nila gina-arkilahan tubtob sa masapwan nalang ini kaina sang aga sa O’Hotel sa Barangay 37.Pahayag sini nga matapos gin-alarma ang mga Police Station sa Bacolod nga ginapangita ang get-away vehicle, ini ang nahibaluan man sang iya nga utod nga amo ang nakakita sang salakyan nga nakapark na sa hotel.
