Sa programa nga Good Morning Philippines, ginpahayag ni Genrick Catalonia, Volunteer Operations Manager sang SAGUP Negros kag isa sa karun ka third year student nga nagakuha sang kurso nga Bachelor of Arts in Social Science sa Carlos Hilado Memorial State College, sang Marso 2022 una nga gin-implementar ang ini nga inisyatibo kun sa diin may yara sila sang partner vendors sa Libertad Public Market nga amu ang ila ginakuhaan sang supply sang mga utan nga indi na sarang nga mabaligya.
Ila ini ginabakal kag sa bulig sang ila resident cook nga nagaluto sang nagkalain-lain nga mga putahe gamit ang narescue nga mga utan, sila ang nagabaligya sang mga sud-an sa ila Community Carenderia nga nahamtang sa Victoria Street, Eroreco Subdivision, Bacolod City.
Ang iban nga mga utan nga indi na maluto ang ila naman ginahimo nga compost.
Suno naman kay Franz Robert Alolod, Chief Financial Officer sang SAGUP Negros kag third year student nga nagakuha sang Bachelor of Science in Accountancy sa University of St. La Salle, may yara sila sang nagkalain-lain nga putahe sa ila Community Carinderia, depende sa ila nagakakolekta nga utan.
Nagapanawagan man ini sa mga pamatan-on nga luyag magvolunteer kag makigbahin sa nasambit nga inisyatibo nga makig-angot lamang sa ila Facebook page.
Bukas man sila sa pagtudlo sa mga organisasyon ukon mga eskwelahan nga luyag magreplicate sang ila proyekto.
Ang Youth Empowering Youth Initiative Inc. ang nalakip sa 20 ka mga National Finalists sa Ten Accomplished Youth Organizations (TAYO) bangud sa ila inisyatibo nga Sagup Negros kag natalana sanday Catalonia kag Alolod nga magpadulong sa Manila agud magtambong sa awarding dala ang paglaom nga sila ang makasulod sa Top 10.
