Mga organic lang anay nga personnel sang Bacolod Traffic Authority Office ang nagpatigayon sang operasyon batok sa colorum nga mga tricycle kaina kag wala pa nakaupod ang iban nga miyembro sang task force.
Sa interview sang Bombo Radyo kay BTAO head Police Major Junji Liba, magasugod na kuntani ang operasyon kaina sang aga apang wala pa nakaupod ang mga volunteers bangud wala sila sang ID.
Bangud sini, ang mga organic personnel lang anay sang BTAO ang nag-operate halin kaina sang aga kun sa diin ginatutukan ang colorum nga mga tricycle, kaupod ang apprehension sang violators sang traffic rules.
May mga nadakpan naman tubtub kaina sang udto.
Ang nagabyahe sang colorum nga tricycle ang may multa nga P1,500 kag dugang nga multa sa iban nga violations kaangay sang P300 para sa kakulang sang driver’s license kag P300 kun wala sang OR-CR.
Suno kay Liba, gina-impound sa BTAO ang tricycle nga may impoundable ground kaangay sang kakulang sang driver’s license kag OR-CR, samtang citation ticket naman ang gina-issue kun kakulang sang business permit ang violation.
Ang multa ang dapat nga bayaran sa City Treasurer’s Office sa Bacolod City Government Center. Samtang, nagpanugyan ang pinuno sang Bacolod Traffic Authority Office sa mga nagapanag-iya sang tricycle nga hulaton nga matapos ang pagproseso sang business permit antes magbiyahe.
Sa interview sang Bombo Radyo kay BTAO head Police Major Junji Liba, ginpahayag sang iban nga tricycle drivers sa orientation nga ginpatigayon sang city government nga may mga driver nga nagabyahe na bisan under process pa ang ila papeles para sa legal nga pagbyahe.
Suno kay Liba, indi otorisado nga magbyahe ang tricycle bisan nakasugod na sa pagproseso sang papeles ang tag-iya sini.
Suno diri, ginagamit ini nga balibad sang iban nga drivers agud nga makabyahe apang isa na ka tuig ang nakaligad humalin sang ginsuguran nila ang pagproseso.
Panugyan sang BTAO head, dapat nga painan sang drivers ukon tag-iya sang tiempo ang pagproseso sang business permit bangud madamo naman ang nakarenew sumugod bulan sang Enero.
Suno sa BTAO head, dapat nga indi magtinamad ang mga tricycle owners sa pagproseso sang permit bangud amo ini ang ila nga palangabuhian.
Suno diri, indi matolerar ang pagbyahe sang colorum bangud ini ang illegal.
