Nagdangat sa P1 million nga balor sang suspected shabu ang nakumpiskar sa isa ka lalaki sa ginpatigayon nga drug buybust operation sa Dalan Luzuriaga, Barangay 6, San Carlos City, Negros Occidental kagab-i.
Ginkilala ang nadakpan kay Mark John Quijano, 23-anyos, ginakabig nga high-value individual kag residente sang Ylagan St. Barangay 6, San Carlos City.
Nakuha kay Quijano ang 16 ka mga transparent plastic sachets nga nagaunod sang ginasuspetsuhan shabu, isa ka Chinese tea plastic, isa ka plastic pouch, sling bag kag 2,300 pesos nga buybust money.
Nagabug-at sang 216 grams ang nakumpiskar nga suspected shabu kag ginabanta nagabalor P1,469,276.
Nakahunong na si Quijano sa San Carlos City Police Station kag natalana nga pasakaan sang kaso nga paglapas sa RA 9165 ukon Comprehensive Dangerous Drugs Act of 2002.
