Nagsumiter na ang isa ka Chinese company sang formal proposal sa city government sang Bacolod nga magapatukod ini sang electric vehicle manufacturing plant sa isa ka lugar sa ciudad.
Sa press conference, ginpahayag ni Bacolod City Mayor Alfredo Benitez nga bunga ini sang iya nga trip sa China bilang kabahin sang delegasyon ni President Bongbong Marcos.
Sa nasambit nga state visit sang bulan sang Enero, nakigkita si Benitez sa mga Chinese investors.
Suno kay Benitez, nakabaton na ini sang draft copy sang memorandum of understanding nagikan sa Jiangsu Fengchuen New Energy Power Technology Co. Ltd., nga nagaplano nga mag-invest sang 200 million US dollars para sa proposed project.
Sa karon, ginareview na sang city government ang proposal kag suno kay Benitez, seryoso ang nasambit nga kompaniya.
Suno sa alkalde, nagaplano ang Chinese company nga magsulod sa public transportation system.
Sa china suno sa local chief executive, electric vehicles na ang kalabanan nga ginagamit sa public transportation bilang sabat sa pagtinguha nga malab-ot ang sustainable kag renewable energy.
Magadala naman sang test units diri sa ciudad ang Jiangsu Fengchuen New Energy Power Technology Co. Ltd.
Ginpropose naman sang kompaniya nga ipreserve ang cultural identity sang Filipino public transport kaangay sang paghimo sang electric vehicle nga Sarao nga jeep ang design.// Suno sa alkalde, proposal pa lang ini kag ginatun-an pa sang city council ang formal proposal.
Tinalikdan nga bulan, nag-abot diri sa ciudad ang mga tiglawas sang kompaniya agud nga magpatigayon sang meeting kay Benitez.
